Mae Rondo Media yn ymfalchïo yn ei chynyrchiadau drama safonol. Mae’r gyfres Rownd a Rownd (S4C) bellach yn ei phedwaredd tymor ar hugain ac wedi dathlu ei milfed pennod nôl yn Ionawr 2014. Mae’r gyfres a enwebwyd am wobr Kidscreen bellach wedi sefydlu ei hun yn un o gonglfeini amserlen S4C. Mae The Indian Doctor (BBC One/ dosbarthu rhyngwladol gan Content Media) yn ddrama gyda Sanjeev Bhaskar yn serennu fel doctor Indiaidd o ddysg sydd, wedi ei ddenu gan addewid yr NHS a Llundain bywiog y ‘60au, yn canfod ei hun mewn meddygfa pentref gloafol yn Ne Cymru. Mae The Gospel of Us yn addasiad ffilm o’r digwyddiad theatr arloesol gyda Michael Sheen.  Perfformiwyd digwyddiad theatraidd cyfoes Passion ar strydoedd Port Talbot gyda phobl leol yn gast, criw ac arwyr. Mae Gwlad yr Astra Gwyn (S4C), enillydd gwobr Gŵyl Cyfryngau Celtaidd, wedi ei gosod yn gyfan gwbl mewn tacsi, gan greu “byd” cyfan y tu mewn i gaban ble mae byrhoedledd nos Sadwrn yn cael ei bortreadu gan ymddangosiadau sydyn myrdd o gymeriadau a arweinir gan Trefor (Rhodri Meilir), y gyrrwr tacsi hygoelus.

Mae’r cwmni yn gynhyrchydd balch nifer o raglenni dogfen pwerus gan gynnwys My Tattoo Addiction (Channel 4/ gwerthiant rhyngwladol BBC Worldwide); astudiaeth o bobl sy’n mynd o dan y nodwydd sy’n gadael llygaid y gwyliwr yn dyfrio ar brydiau! Enillydd Bafta Y Trên i Ravensbrück; taith emosiynol y teulu Gruffydd o Gymru i’r Almaen i ddysgu mwy am ddioddefaint y teulu yn ystod yr Ail Ryfel Byd. Malcolm Allen: Un Cyfle Arall; rhaglen ddogfen llawn emosiwn gan un o bêl-droedwyr mwyaf talentog Cymru am ei frwydr gydag alcohol. Gohebwyr: Wyre Davies gyda’r gohebydd BBC yn mynd ar daith i ddysgu mwy am ei dad-cu a fu bron a chael ei ladd mewn llongddrylliad dramatig ger arfordir de Chile. Hillsborough: Yr Hunllef Hir; stori ddirdynol trychineb Hillsborough, Sheffield lle bu farw 96 o gefnogwyr Lerpwl mewn gêm bêl-droed ar 15 Ebrill, 1989. Cipiodd y rhaglen wobr arbennig ‘Ysbryd yr Ŵyl’ yng Ngwyl Cyfryngau Celtaidd Llanelli 2018.

Yn gwmni annibynnol blaenllaw ym maes rhaglenni cerddoriaeth glasurol, mae Rondo wedi bod yn bartner darlledu Eisteddfod Gerddorol Ryngwladol Llangollen ers 1994, gan gynhyrchu rhaglenni byw ac uchafbwyntiau cystadlaethau a chyngherddau yn ystod wythnos yr Eisteddfod (S4C a BBC). Mae platfformau digidol gwefan llangollen.tv ynghyd a’r ap wedi denu cannoedd o filoedd o gynulleidfa fyd-eang. Mae digwyddiadau megis Roald Dalh’s City of the Unexpected (BBC Wales) WOMEX: Caerdydd (BBC ac S4C), Côr Cymru (S4C), Band Cymru (S4C), Chwilio am Seren: Junior Eurovision (S4C) a Gŵyl Gerdd Dant (S4C a BBC Radio Cymru) yn dystiolaeth bellach o gynyrchiadau uchelgeisiol a heriol o bortffolio eang ac amrywiol y cwmni.

Diddanu yw ein busnes. Mae ein cynhyrchiad Chwilio am Seren: Junior Eurovsion yn gystadleuaeth newydd sbon sy’n cynnig cyfle unigryw i gynrychioli Cymru yn un o gystadlaethau canu mwya’r byd i bobol ifanc – sef y Junior Eurovision Song Contest 2018 yn Minsk, Belarws. Dyma gyfle bythgofiadwy i sêr ifanc y dyfodol arddangos eu doniau a gwireddu breuddwyd.

Dros 30 mlynedd o brofiad cynhyrchu rhaglenni pêl-droed ynghyd a chynnwys digidol arloesol i S4C, mae profiad Rondo o gynhyrchu pêl-droed rhyngwladol a domestig i raglenni Sgorio yn cynnwys darlledu pêl-droed byw mor bell ac agos â Reykjavik, Vaduz, Podgorica, Helsinki a Hwlffordd! Ym mis Medi 2018 cyhoeddodd S4C gytundeb arbennig Sgorio i ddarlledu pob un o gemau Cymru yn nhwrneimant Cynghrair y Cenhedloedd UEFA a gemau rhagbrofol Pencampwriaeth UEFA Ewro 2020  – cyfanswm o 16 gêm byw.